Ölsəm, bir gün gəl qəbrimin üstünə... Bircə dəstə bənövşə qoy, bəsimdir... - GÜNÜN ŞEİRİ

1001info.az  "Günün şeiri" rubrikasında Azərbaycanın ilk qadın Xalq şairi  Mirvarid Dilbazinin  "İstəsəydim" şeirini təqdim edir:

      İSTƏSƏYDİM 

İstəsəydim səni səndən alardım,
Gözəlləri öz taxtından salardım.
Ürəyimi ürəyinə calardım,
Sən yanardın, mən baxardım tüstünə.

Ulduz olub öz zirvəmdən enərdim,
Dövrəndəki mələkləri yönərdim.
Al laləyə, qərənfilə dönərdim,
Səpilərdim yollarının üstünə.

İstəsəydim vüsalına yetərdim,
Mən gül olub ürəyində bitərdim,
Orda bülbül fəryadıyla ötərdim,
Mən yanardım, sən baxardın tüstümə.

Ölsəm, bir gün gəl qəbrimin üstünə,
Bircə dəstə bənövşə qoy, bəsimdir.
Baş üstündə bir qaranquş ötəcək,
O da sənə minnətdarlıq səsimdir .