Prezident Ersin Tatar Azərbaycan nümayəndə heyətini qəbul edib

Kuzey Kıbrıs Türk Cümhuriyyətinin (KKTC) Prezidenti Ersin Tatar Azərbaycan Milli Elmlər Akademiyası Arxeologiya və Antropologiya İnstitutunun İslam Arxeologiyası Bölməsinin rəhbəri  professor  Qafar Cəbiyev və onu müşayiət edən nümayəndə heyətini qəbul edib.   Azərbaycan-Kipr Dostluq Cəmiyyətinin dəvəti ilə baş tutan səfərdə nümayəndə heyətini cəmiyyətin sədri Orxan Həsənoğlu da müşayiət edib.

1001info.az xəbər verir ki, Prezident Ersin Tatar qəbul zamanı iki ölkə arasındakı münasibətdən məmnunluğunu ifadə edərək, Türkiyə ilə Azərbaycan arasındakı əlaqələrin inkişafını böyük qürurla izlədiyini bildirib. “Bir millət, üç dövlətik. Hamımız eyni türk soykökündən gəlirik,” – deyə o, qeyd edib. O, milli birlik və həmrəylik istiqamətində hərəkət etməyin vacibliyini vurğulayıb, Azərbaycanın qardaş dövlət olduğunu və Şərqi Aralıq dənizində yerləşən türk dövləti olan KKTC-yə göstərilən dəstəyin danılmaz bir reallıq olduğunu bildirib.

Prezident Tatar Azərbaycan Prezidenti İlham Əliyevin KKTC-nin beynəlxalq aləmdə tanıdılması istiqamətində göstərdiyi dəstəyi və səyləri yüksək qiymətləndirərək, bunun Kipr türk xalqı üçün dəyərli bir addım olduğunu bildirib. Azərbaycan və KKTC arasında mövcud olan tarixi və mənəvi bağların dərinliyinə toxunaraq eyni millətin övladları olaraq, bütün sahələrdə əməkdaşlığın genişlənməsindən məmnun olduqlarını vurğulayıb. “Eyni dilə, dinə, mədəniyyətə və qəlb birliyinə sahib olan, eyni soydan gələn bir millətik. Biz Azərbaycan xalqının əsl qardaşlarıyıq. Bu münasibətlə bütün Azərbaycan xalqına səmimi hörmət və salamlarımı çatdırıram,” – deyə o, çıxışını tamamlayıb.

Professor  Qafar Cabiyev isə səfərdən duyduğu məmnuniyyəti ifadə edərək, həyata keçirilən elmi tədqiqatlar və layihələr haqqında ətraflı məlumat verib.