Azərbaycan Rəssamlar İttifaqının Vəcihə Səmədova adına sərgi qalereyasında məşhur qazax rəssamı Batuxan Baymenin “NOMAD: BLACK & WHITE” sərgisinin açılışı olub. 

525.az xəbər verir ki, mərasimində Qazaxıstanın Azərbaycandakı səfiri Alim Bayel, Azərbaycanın mədəniyyət nazirinin müavini Səadət Yusifova və Rəssamlar İttifaqının sədri Fərhad Xəlilov iştirak ediblər.

Səfir A. Bayel sərginin təşkilatçılarına qazaxıstanlı rəssama dəstəyə görə təşəkkürünü bildirib, onun əsərlərində türkdilli xalqlara məxsus ortaq tarixin, mədəniyyətin və məişətin öz əksini tapdığını qeyd edib. Diplomat bu cür tədbirlərin qardaş ölkələrin daha da yaxınlaşması baxımından önəmini vurğulayıb.

Batuxan Baymen Qazaxıstanın ən tanınmış müasir qrafika rəssamlarından biridir. Onun əsərləri miqyaslılığı, dərin düşüncəsi, unikal çöl koloritilə seçilir. Müasir təsviri incəsənətdə yeni tendensiyalara sadiq qalaraq, o, yaradıcılığında ilhamı əcdadların köçəri mədəniyyətinin qiymətsiz irsindən alır. Onun əsərləri qədim türklərin tarixi və köçərilərin dünyası əks etdirir. 

Rəssam qrafik əsərlərində türk xalqlarının fəlsəfəsinin ümumiliyini dərk və təhlil edərək, Abay Kunanbayevin, Çingiz Aytmatovun, Əlişir Nəvainin yaradıcılığının motivlərindən istifadə edir.

Pərvanə Sultanova