Şair-publisist İradə Əlilinin doğum günüdür

Bu gün Peşəyönümlü Təhsilin İnkişafına Dəstək İctimai Birliyinin sədri, Azərbaycan Yazıçılar Birliyinin üzvü, "Rəsul Rza" mükafatı laureatı, Prezident təqaüdçüsü  İradə Əlilinin doğum günüdür. İradə xanım çox gözəl şeirlər yazmaqla bərabər  Qarabağ mövzusunda  sanballı kitablar müəllifidir.
1001info.az olaraq dəyərli şair-publisist İradə xanımı ad günü  münasibətilə ürəkdən təbrik edir, cansağlığı, səadət dolu ömür və gələcək işlərində uğurlar arzulayırıq.
“Günün şeiri” rubrikasında İradə xanımın  sevilən şeirlərindən birini təqdim edirik. 

          GƏRƏK ÖYRƏTMƏZDİN...

Saçım əllərinin tumarın istər,
Gözüm gözlərinin odlu mehrini.
Əlim ovucunda isinmək istər,
Sözüm sözlərinin şirin sehrini.
Həsrət qalırdımsa ayaq izinə,
Gərək öyrətməzdin məni özünə!

Qəlbimin atəşi səni arayır,
Baxışım tək sənə ünvanlanıbdı.
Gözlərim hər yerdə səni axtarır,
Könlüm sevgin ilə damğalanıbdı.
Ürəyim dözməyir sənsizliyimə,
Gərək öyrətməzdin məni özünə!

Doğulan hisslərim, şux duyğum oldun,
Sinəmdə ürək də sözümə baxmır.
İstəyirəm səndən hey uzaqlaşım,
O şəhla gözlərin məni buraxmır.
Sənin məhəbbətin, sevgin xəzinə,
Gərək öyrətməzdin məni özünə!

Yaralı ov kimi çırpınan könlüm
Elə fəryad edər, sızlar səninçün.
İlqarına sadiq gözümün yaşı
Axır, dayanmayır hər gecə, hər gün.
Gözlərim həsrətlə baxır gözünə,
Gərək öyrətməzdin məni özünə!