Sinəmdən arxalı qışı qovuram...Dünyanın baharı bahar olunca... - İnqilab İSAQ

    1001info.az "Günün şeiri" rubrikasında  İnqilab İsaqın yaradıcılığına yer ayırıb.

  Dünyanın baharı
 
Puçurla, çiçəklə döyülür qapım,
Havada küləkli yaz ismarışı.
Torpaq da uşaqtək elə öyünür,
Canında qalmayıb bir çimdik acı.
 
Qupquru ümiddə canı yanğılı,
Çarəmi axtarır çiçək açmağa?
Soyuq söz demək də gəlmir əlimdən,
Harda qanadlanım, könül, uçmağa?
 
Tikan gül üstündə xəcalət çəkir,
Bilmir bədniyyəti gizləsin, necə?
Bir arx qırağında çərləyən söyüd,
Yolları həsrətdə gözləsin, necə?
 
Xəyalın ağlına gör nələr gəlir,
Telinə bənövşə düzən qıza bax.
Utancaq istəklər sözdə közərir,
Xəbəri taybatay qapımıza bax.
 
Belə çal-çağırda de, kim darıxar?
Göylərə baxıram, gözüm doyunca.
Sinəmdən arxalı qışı qovuram,
Dünyanın baharı bahar olunca...