Çingiz Abdullayevdən gözlənilən addım...  ATV telekanalı məhkəməyə verilir 

 Dünya şöhrətli yazıçı Çingiz Abdullayev ATV telekanalını məhkəməyə verməyə hazırlaşır.

1001info.az  kulis.az-a istinadən xəbər verir ki, bunu məşhur yazıçı  açıqlamasında deyib.

“Azərbaycan Yazıçılar Birliyinin hüquqşünası məhkəməyə xüsusi ittiham qaydasında şikayət hazırlayır. İddiaçı təşkilat ola bilməz deyə, mənim adımdan yazılacaq. Təzminat 1 manat da olsa, 100 min manat da olsa, almayacağam. Hamısını şəhid ailələri üçün köçürəyəcəyik. Mənə nə o aparıcının, nə də telekanalın pulu lazımdır. Aparıcı danışıb, öz səviyyəsini göstərib” deyə, o, əlavə edib.

Qeyd edək ki, bir müddət əvvəl ATV-də yayımlanan “Xəbərin olsun” verilişinin aparıcısı Kubra Məhərrəmova Çingiz Abdullayevin əsərlərini “zir-zibil” adlandırıb. Bunun ardından AYB bəyanat yayıb. Bəyanatda qeyd olunub ki, telekanal bununla bağlı açıqlama verməli və aparıcı cəzalandırılmalıdır. Bu gün isə Audiovizual Şuradan APA-ya deyilib ki, bu hadisə ilə bağlı ATV-yə irad bildirilib və müvafiq tövsiyələr verilib.

Xatırladaq ki, Atv telekanalında aparıcının efirdən səsləndirdiyi sözlər  cəmiyyət  tərəfindən birmənalı qarşılanmayıb.  Sosial şəbəkə istifadəçiləri bu barədə statuslar paylaşaraq yazıçının ünvanına xoş sözlər yazaraq  həm kanala, həm də aparıcıya etirazlarını bildirib. Rəylərdə dünya şöhrətli yazıçıya qarşı bu cür davranışa son qoyulması tələb olunub.