Ölkəmiz Şərqi Avropa və Mərkəzi Asiya Pediatrlarının II Konqresində təmsil olunub

Rusiya pediatriyasının banilərindən biri G.N.Speranskinin 150 illik yubileyinə həsr olunan “Pediatriyanın aktual problemləri” mövzusunda Rusiya Pediatrlarının XXIV Konqresi keçirilib.

Azərbaycan Pediatrlar Assosiasiyasından AZƏRTAC-a verilən məlumata görə, dünyanın müxtəlif ölkələrindən 7 mindən çox nümayəndənin iştirak etdiyi konqres çərçivəsində çoxlu sayda elmi simpoziumlar, forumlar və seminarlar təşkil edilib. Hibrid formatda olan konqresdə ölkəmiz də təmsil olunub.

Konqresdə aparıcı yerli və xarici ekspertlər tərəfindən pediatriyanın aktual problemləri, uşaqların effektiv profilaktikası, diaqnostikası, müalicə və reabilitasiyasında müasir yanaşma və digər bu kimi istiqamətlərdə uşaqların sağlamlığının qorunması və möhkəmləndirilməsi strategiyalarına dair məsələlər müzakirə edilib, məruzələr təqdim olunub.

Ənənəvi olaraq tədbirdə uşaq həkimləri, uşaq tibb bacıları, pediatriya sahəsində tibb və təhsil təşkilatları, habelə uşaqların sağlamlığının qorunmasında mühüm xidmətləri olan elm xadimləri, dövlət və ictimai xadimlər Rusiya Pediatrlar İttifaqının fəxri mükafatlarına layiq görülüblər.