Onda da, indi də  Allahımdan bircə xahişim var...- Bəxtiyar QARACA

27 mart  Bəxtiyar Qaracanın doğum günüdür. Onu daha çox efirlərdən tanısaq da, o,   "Meteor yağışları", "Yerlə göy arasında", "İstiqlal düşüncələri", “Hüseyn Ərəblinski”  kitablarının, fin, rus, ispan ədəbiyyatından tərcümələrin,  çoxsaylı məqalələrin, bədii və sənədli filmlərin müəllifidir.  Azərbaycan Respublikası Prezidentinin təqaüdünə və "Ali Media"  mükafatına layiq görülüb, "Tərəqqi" medalı və “Azərbaycan Xalq Cümhuriyyətinin 100 illiyi yubiley medalı” ilə təltif olunub. 

1001info.az yazıçı-publisist, jurnalist  Bəxtiyar Qaraca ilə müsahibəni təqdim edir. 

- Bəxtiyar  müəllim, 27 mart  Sizin özəl gününüzdür.  Yaşınızı soruşmuruq, ömrün hansı çağındasınız deyirik… 

Bəxtiyar Qaraca: -Ürəklə və səmimi - qəlbdən deyirəm: Ömrün ən gözəl çağında… Otuz yaşım olanda da özümü 37 yaşındakı kimi hiss edirdim, indi də elə həmin o yaşdayam. Sadəcə olaraq geriyə baxanda həyatımda olan bəzi boşluqları görüb də bu günü, anı, saatı olduqca dəyərli bilirəm, daha əziz tuturam.