Türkiyədə Hüseynbala Mirələmovun kitablarının təqdimatı oldu

 1001info.az xəbər verir ki, martın 14-də Türkiyənin Bandırma şəhərində Bandırma Onyedi Eylül Üniversitetində azərbaycanlı yazıçı-dramaturq Hüseynbala Mirələmovun “Ənvər Paşa” və digər kitablarının  təqdimat mərasimi olub.

Universitetin rektoru professor  İsmail Boz Türkiyə türkcəsinə çevrilən bu kitabların müəllifi Hüseynbala Mirələmov imzasının türk oxucularına yaxşı tanış olduğunu vurğulayıb və  "Ənvər Paşa"nı  Azərbaycan-Türkiyə qardaşlığına böyük töhfə hesab edib.

Təqdimatda iştirak edənlər böyük sevgi və sayğı ilə qələmə alınan  əsərlərin Türkiyədə böyük maraq doğuracağına əminliklərini ifadə ediblər, kitabları yüksək dəyərləndiriblər.   Qeyd edək ki, martın 15-i universitetdə keçiriləcək konfransda da Hüseynbala Mirələmovun kitablarının təqdimatı, ədəbiyyat adamları ilə görüşü gözlənilir. 

Xatırladaq ki, Hüseynbala Mirələmovun  "Yurda fəda üç paşa" trilogiyasının birinci kitabı olan "Ənvər Paşa" əsərində bu görkəmli tarixi şəxsiyyətin həyat və fəaliyyətinə yeni rakursdan nəzər salınıb. Müəllif arxiv materialları və sənədlər əsasında Ənvər Paşanın Azərbaycanla əlaqələri və millətimizin öndə gedən aydınları ilə olan dostluq münasibətlərini, Turan İslam İmperatorluğu qurmaq uğrunda apardığı böyük mücadiləni, şəxsi yaşantılarını, sevgi və iztirablarını, Tacikistanın Bəlcivan torpağında şəhidlik məqamına yüksəlişini yazıçı təxəyyülünün köməyilə qələmə alıb".