Ulu öndər şeir-sənət hamisi, sülh, əmin-amanlıq tərəfdarı idi...- Səadət Məhərrəmova yazır

Bir daha fenomen şəxsiyyət haqqında

Tanrı insanı yaradan gündən bəşər tarixi yaranmışdır. Bəşərin tarixi cəmiyyətin tarixi deməkdir. Cəmiyyətin tarixi ona görə yaranmışdır ki, insanlar yaşadığı günlərdən dönüb arxaya baxsın, keçib gəldiyi zamanın tarixindən ibrət alaraq öz gələcək yolunu, fəaliyyət istiqamətini müəyyənləşdirsin. Bunun üçün insan  tarixin səhifələrini öz şanslı və əbədiyaşar əməlləri ilə bəzəyən şəxsiyyətlərin tarixi rolunu bilməlidir. O bilməlidir ki, tarix necə şəxsiyyətlər yaradır, bu şəxsiyyətlər öz növbəsində tarixi necə yaradırlar? İnsan bilməlidir ki, cəmiyyəti xoşbəxtliyə aparan yolda Tanrı insanları niyə əvvəl imtahana çəkir, sonra ona tale bəxş edir?! O bilməlidir ki, niyə kimsə bu dünyada ona verilən müvəqqəti həyatı şən-şux, deyə-gülə yaşayır, kimisə ah-ufla ömrü başa vurur? İnsan onu da bilməlidir ki, Allahın yazısı ilə yaşayan bu insanların fərqi orasındadır ki, birincilər yaşayır, yaşadır və yaradırlar. Yaradanlar və yaşadanlar sağlığında əbədiyyətə qovuşurlar. Belə şəxsiyyətlər bəşər tarixində tək-tək olmuşdur. Bu insanlardan biri də Heydər Əliyevdir. Heydər Əliyevin yaratdığı tarixi açıb vərəqləyəndə, şəxsiyyəti haqqında düşünəndə ilk təsəvvürdə canlanan onun milli vətəndaş, siyasi dövlət rəhbəri kimi bənzərsiz simasıdır. Bu sima dahi bir rəhbərin öz xalqına, millətinə, cəmiyyətimizin hər bir üzvünə təmənnasız xidmət etmək, öz xoşbəxtliyini xalqının xoşbəxtliyində görmək istəyində parlayır!