Al bizləri qoynuna, al, bayrağım, dalğalan!

1001info.az “Günün şeiri” rubrikasında müasir Azərbaycan poeziyasının tanınmış nümayəndəsi  Mahirə Nağıqızının “AL BAYRAĞIM ”şeirini  oxuculara təqdim edir. 

    AL BAYRAĞIM 

Xalqımızın gəldiyi yolun sinə dəftərin, 
Göyərən arzuların, al bayrağım, dalğalan! 
Yüksəlişin-əlacı sağalmamış dərdlərin, 
O dərdləri yadına sal, bayrağım, dalğalan! 

Min illərdir içimiz rənglərini göyərdir,
 Yaşamaq haqqımızın əbədi rəmzisən bir.
 Ruhumuz-qəlbimizdə asılan dirəyindir, 
O dirəkdə uca dur, qal, bayrağım, dalğalan! 

Qəlbimizdə oxunan türkülərlə yarandın,
 Altaylardan salınan körpülərlə yarandın.
 Sabahlara aparan ümidlərlə yarandın,
 Al bizləri qoynuna, al, bayrağım, dalğalan!

 Qılıncında Babəkin, Nizaminin şeirində,
 Yaşadın susmayacaq vətən nəğmələrində. 
Qarşında baş əyən var dünyanın hər yerində, 
Oğulun var, qızın var, var, bayrağım, dalğalan! 

Hopub, bağrına hopub, hopub şəhid qanları,
Sənə bürünüb gəlib min-min yurd qurbanları. 
Dədə əmanətisən-qızları, oğlanları 
Bu vətənin səninçün yar-bayrağım, dalğalan! 

Azərbaycan əsgəri qanım halaldır-dedi. 
Ucada dayanmağın bir cəh-cəlaldır-dedi. 
Gücünün qarşında düşmən olan əyildi,
 O bilir ki, olacaq xar, bayrağım, dalğalan!