Ay dünya, nə yaman havalanmısan... -Tahir Rza

1001info.az "Günün şeiri" rubrikasında şair Tahir Rzanın "Ay dünya, nə yaman havalanmısan"şeirini təqdim edir.

Ay dünya, nə yaman havalanmısan

Unudub yaxşını, isməti, arı,

Qanmaza vermisən dövləti, varı.

Urvata mindirib urvatsızları,

Ay dünya, nə yaman havalanmısan.

Talelər ümiddən asılıb qalıb,

Ümidlər bir küncə qısılıb qalıb,

Bəndimiz, bərəmiz basılıb qalıb,

Ay dünya, nə yaman havalanmısan.

Qurdu quzu ilə dost edən gündən,

Əhvalın dəyişib, küt gedib gündən.

Yaxa tutdurmursan, ötürsən gendən,

Ay dünya, nə yaman havalanmısan.

Haqq deyən dillərdə haqq daşa dönüb,

İnsan gözlərində bir quşa dönüb,

Nadanlar səninçün sirdaşa dönüb,

Ay dünya, nə yaman havalanmısan.

Üzünə gülənlər gülməz bir daha,

Dərdindən ölənlər ölməz bir daha,

Sevincli günlərin gəlməz bir daha,

Ay dünya, nə yaman havalanmısan.

Dərd-səri üstümə az əsdi, düşün,

Həsrətin, hicranın di bəsdi, düşün.

Qoynun qananlara qəfəsdi, düşün,

Ay dünya, nə yaman havalanmısan.

Aldanıb dilinə, düşüb felinə,

Ağıllı adamlar getməz dərinə.

Tahiri qoymusan uşaq yerinə,

Ay dünya, nə yaman havalanmısan.