Aygün Ağamalının rəhbərliyi ilə “Fashion Academy” layihəsinin həyata keçirilməsinə start verildi

1001info.az xəbər verir ki, “Qadınların İnkişafına və Maarifləndirilməsinə Dəstək” İctimai Birliyi (QİM), “Magen David International Center for Women” və  məşhur modelyer-dizayner, sahibkar xanım, İtaliya markası olan Aygün Ağamalının rəhbərliyi ilə “Fashion Academy” layihəsinin həyata keçirilməsi yönündə ilk addımlar atılmağa başlayıb. Layihə çərçivəsində 6 noyabr 2023- cü il tarixində ilk məlumat sessiyası təşkil edilib. Tədbir Azərbaycanın Dövlət Himninin səslənməsi   və  Vətənimizin azadlığı uğrunda canından keçib ən ali məqama yüksələn şəhidlərimizin xatirəsinin bir dəqiqəlik sükutla yad edilməsi ilə açıq elan edildi. 

Tədbiri giriş sözü ilə açan layihənin rəhbəri Aygün Ağamalı layihənin əsas məqsədləri haqqında geniş məlumat verdi.  “Qadınlara şəxsi moda brendlərini yaratmağa, kreativ dizayn, dəb illüstrasiyası, material və parça teksturaları, geyimin növləri, modellərin qurulması və digər istiqamətlər üzrə modelyer-dizayner dərsləri təqdim etmək, həmçinin, biznesə başlamaq istəyən və yeni ideyalarını həyata keçirmək istəyən qadınlar və gənc qızlar arasında sahibkarlıq mühitinin stimullaşdırılmasına dair maarifləndirmə işinin aparılması, mentorluq dəstəyi ilə yeni biznes təşəbbüslərinin yaradılması və dəstəklənməsidir” ideyası olduğunu nəzərə çatdırdı.

Sonra  “Magen David İnternational Center  for Women“nin  direktoru Aygün Əhmədova çıxış edərək “layihənin əsas hədəflərindən birinin qeyri-neft sektorunun, sahibkarlığın inkişafının sürətləndirilməsi əsasında ölkədə əldə olunmuş dinamik inkişafın davamlılığına töhfə vermək olduğunu” vurğuladı. 
 
Daha sonra QİM sədri Şəfa Əmirova çıxış edərək layihənin sonunda iştirakçıların , yeni əldə etdikləri bacarıq üzrə, karyeralarına müsbət təsir edəcək “İtaliya markası olan Aygün Ağamalı imzalı” sertifikat, həmçinin “Qadınların inkişafına və maarifləndirilməsinə dəstək” İctimai birliyindən biznesin inkişafına təkan verəcək ödənişsiz biznes konsultasiya əldə edəcəklərini” qeyd etdi. 

İşgüzar mühitdə,  müsbət emosiyalara köklənmiş, xoş ab-havada, səmimi ortamda baş tutan tədbirdə  tanınmış insanlar,  təhsil, mədəniyyət, incəsənət və digər sahələrdə öz sözünü demiş  qadınlar və gənc iştirakçılar iştirak edirdi. 

 
Tədbirdən gəldiyimiz qənaət: Azərbaycan qadını müasir cəmiyyətin inkişafına əvəzsiz töhfələr verməkdə davam edir,   ölkəmizin ictimai-siyasi, mədəni və iqtisadi həyatında fəal iştirak edərək  bütün sahələrdə öz sözünü deyir. Əlbəttə, bu, bizim üçün fəxrdir. 

.