Lənkəranın mədəni həyatında əlamətdar hadisə - "Gəlinlik paltarı" səhnədə

Nəcəfbəy Vəzirov adına Lənkəran Dövlət Dram Teatrında səhnələşdirilən “Gəlinlik paltarı” tamaşası şəhərin mədəni həyatında əlamətdar hadisəyə çevrildi. Yazıçı-dramaturq Hüseynbala Mirələmovun eyni adlı əsəri əsasında hazırlanan səhnə işi tamaşaçılar tərəfindən böyük maraq və alqışlarla qarşılandı.

“Gəlinlik paltarı” ailə münasibətlərinin incə qatlarını, qadın taleyinin həssas məqamlarını və cəmiyyətin mənəvi-psixoloji dilemmalarını ustalıqla təqdim edir. Gəlinlik paltarı burada yalnız bir geyim deyil, saf niyyətlərin, ümidlərin, arzuların və bəzən də puç olan xəyalların rəmzi kimi çıxış edir. Əsərdə insan xarakterlərinin daxili toqquşması, vicdanla seçim arasında qalan talelər, valideyn-övlad münasibətlərindəki ziddiyyətlər tamaşaçıya düşündürücü mesajlar ötürür. Səhnə həllində dinamika ilə lirizmin vəhdəti qorunub saxlanılıb, aktyorların emosional ifası isə müəllif mətninə canlı nəfəs verib.

Tamaşadan sonra keçirilən görüş gecəyə xüsusi məna qatdı. Azərbaycan Yazıçılar Birliyinin Lənkəran bölməsinin rəhbəri Qafar Cəfərli çıxışında vurğuladı ki, Hüseynbala Mirələmovun dramaturgiyası milli köklərə bağlı olmaqla yanaşı, müasir insanın mənəvi axtarışlarını da əks etdirir. Onun sözlərinə görə, müəllifin obrazları sxematik deyil, canlı və həyatidir, hər bir personaj öz daxili həqiqəti ilə tamaşaçı qarşısına çıxır. Bu baxımdan “Gəlinlik paltarı” region teatrının repertuarında mühüm yer tutacaq sanballı səhnə işidir.

Teatrın direktoru, Azərbaycanın əməkdar mədəniyyət işçisi, Dağıstanın əməkdar artisti Laləzar Hüseynova qeyd etdi ki, Lənkəran səhnəsi hər zaman ciddi ədəbi materiala üstünlük verib və Mirələmovun əsərinin seçilməsi buna bariz nümunədir. O vurğuladı ki, tamaşanın hazırlanması prosesində yaradıcı heyət böyük məsuliyyət hissi ilə çalışıb və nəticədə tamaşa həm estetik, həm də ideya baxımından dolğun alınıb.

Hüseynbala Mirələmov çıxışında Lənkəran tamaşaçısına səmimi münasibətinə görə minnətdarlığını bildirdi və qeyd etdi ki, dramaturq üçün əsərin səhnədə yaşaması xüsusi duyğudur. Onun sözlərinə görə, “Gəlinlik paltarı”nı yazarkən məqsədi ailə dəyərlərinin müqəddəsliyini və insanın mənəvi məsuliyyətini ön plana çəkmək olub.

Tədbirdə həmçinin Lənkəran Şəhər İcra Hakimiyyəti başçısının müavini Ülviyyə Əliyeva çıxış edərək rayon rəhbərliyi adından yaradıcı kollektivə təşəkkürünü çatdırdı və mədəniyyətin inkişafının daim diqqət mərkəzində saxlanıldığını vurğuladı.

Gecənin maraqlı çıxışlarından biri xalq yazıçısı Çingiz Abdullayevə məxsus oldu. O, Lənkəranın onun üçün doğma şəhər olduğunu qeyd edərək, şəhərin son illərdə xeyli inkişaf etdiyini bildirdi. Çingiz Abdullayev Hüseynbala Mirələmovun yaradıcılığını yüksək qiymətləndirərək vurğuladı ki, “Gəlinlik paltarı” əsərində psixoloji dərinlik və dialoqların həyatiliyi xüsusi diqqət çəkir.

Professor Elman Quliyev çıxışında Mirələmovun dramaturgiyasının elmi-nəzəri baxımdan da maraqlı olduğunu dedi və əsərdə klassik dramaturji ənənə ilə müasir düşüncənin sintezini xüsusi qeyd etdi.

Əməkdar jurnalist Bəxtiyar Qaraca müəllifin yaradıcılıq prinsipiallığından danışaraq bildirdi ki, “Gəlinlik paltarı” ailə institutunun qorunması və mənəvi dəyərlərin təbliği baxımından mühüm ictimai mesajlar verir.

Tanınmış təhsil işçisi Rövşən Ağayev isə vurğuladı ki, Mirələmovun əsərləri təkcə ədəbi hadisə deyil, həm də tərbiyəvi mənbədir və belə tamaşalar gənclərin estetik dünyagörüşünün formalaşmasına mühüm töhfə verir.

Gecə gur alqışlarla yekunlaşdı. Təqdim olunan gül dəstələri və səmimi təşəkkürlər bir daha göstərdi ki, Lənkəran tamaşaçısı sənətə yüksək qiymət verir. “Gəlinlik paltarı” isə bu axşam təkcə bir tamaşa deyil, sözlə səhnənin və tamaşaçı ilə sənətkarın qovuşduğu mənəvi bir körpü kimi yadda qaldı.

Sonda xüsusi olaraq qeyd olunmalıdır ki, bu uğurlu səhnə işinin ərsəyə gəlməsində Laləzar Hüseynovanın əməyi danılmazdır. Onun rəhbərliyi altında Nəcəfbəy Vəzirov adına Lənkəran Dövlət Dram Teatrı son illər yaradıcılıq baxımından yeni mərhələyə qədəm qoyub və “Gəlinlik paltarı” kimi sanballı əsərlərin yüksək səviyyədə təqdimatı bunun bariz göstəricisidir.

Kəmalə Mirzəyeva

1001info.az