Ürəyim söz yuvasıdır...- Qalib ŞƏFAHƏT

1001info.az Qalib  Şəfahətin şeirlərini təqdim edir.

 

SÖZÜ ÜRƏYİMƏ ƏKDİM

Qəriblikdə qalmaz sözüm.

Sözlərim haqq davasıdır.

Qərinələr dolanacaq,

Sözüm söz tək qalasıdır.

 

Nadana yaman olacaq,

Odunda yanan olacaq.

Dərk edib qanan olacaq,

Həqiqətin aynasıdır.

 

Bəhrəsiz kol-kosu qırdım,

Sözdən mən bir yuva qurdum.

Sözdür mənim doğma yurdum,

Bir ömürün binasıdır.

 

Ümidlərim pərəsəngdi,

Arzuları çəpər çəkdim.

Sözü ürəyimə əkdim-

Ürəyim söz yuvasıdır.  

 

 KİM OLACAQ

Kim ağladıb bu qadını?

Güldürəni kim olacaq?!

Dərdinə şərik çıxanı,

Dindirəni kim olacaq?!

 

Dözür öz dərdinə dözür,

Üzür öz dərdində üzür.

Xəyalları göydə gəzir,

Endirəni kim olacaq?!

 

Dərdi öz dərdimdən betər.

Nə tapılmaz, nə də itər.

Ya ismarıc, ya bir xəbər,

Göndərəni kim olacaq?!

 

Günah gəzmə bu qadında,

Yaxşısında, yamanında.

Alovlanır öz odunda,

Söndürəni kim olacaq?! 

 

    DƏRDİMDƏN BAXDIM

Dərdlərim iy verir iyi,

Mən sənə dərdimdən baxdım.

Bu dünyanın hayı-küyü,

Mən sənə dərdimdən baxdım.

 

Dərdim cürüyübdü deyən,

Ay məni qınayan, söyən.

Dərdlərimə boyun əyən,

Mən sənə dərdimdən baxdım.

 

Bu dərdi sən verdin mənə,

Dərdi rəva gördün mənə.

Müjdə gətir bu xoş günə,

Mən sənə dərdimdən baxdım.

 

Sevinci qoydum qırağa,

Arzular gəlmir darağa.

Qoymadım gözdən uzağa,

Mən sənə dərdimdən baxdım.

 

Vaxt yox dərdi ovutmağa,

Nə də sərib qurutmağa.

Gedib ilişib  budağa,

Mən sənə dərdimdən baxdım.

 

Dərdin çəkən mənəm, mənəm,

Nə bu günəm, nə də dünən.

Arzusunu didib yeyən,

Mən sənə dərdimdən baxdım.

 

Düşmüşəm səndən qırağa,

Saldın  borana, sazağa.

Nə var dərdimdən uzağa,

Mən sənə dərdimdən baxdım.