Yol gedirsən neçə ildi... Eldən elə, Nazlı, Nazlı... 

1001info.az  “Günün şeiri” rubrikasında  filoloq-alim, professor, tanınmış şairə Mahirə Nağıqızının  “Nazlı, Nazlı “ şeirini təqdim edir.

 Xatırladaq ki, Mahirə xanımın anası, bu günlərdə vəfat edən  Nazlı Nağıyeva Vətən-yurd nisğili, Dərələyəz həsrəti ilə dünyadan köçdü.   

Dərələyəz mahalının ağbircək anası Nazlı nənə 1932-ci ildə dünyaya göz açıb, övladları bu gün dövlətçiliyimizin qorunması‚ ölkəmizin milli maraqlarının təmin olunması yolunda əzmlə çalışır, vətənimizə ləyaqətlə və sədaqətlə xidmət edırlər. 

Allah rəhmət eləsin! 

  Nazlı, Nazlı

De, hardan köçün gəlir, 
Özün belə nazlı-nazlı.
 Birin gedir, üçün gəlir,
 Gəlmə dilə, Nazlı, Nazlı! 

Dərələyəz ağır eldi,
 Qədrini bilənlər bildi.
 Yol gedirsən neçə ildi
 Eldən elə, Nazlı, Nazlı. 

Böyüməmiş ana oldun,
 Tez oyandın, gec uyudun.
 Ayağını şehdə yudun, 
Dərdin yelə, Nazlı, Nazlı!

 Atama qardaş olubsan, 
Ocağına daş olubsan. 
Qız, gəlində baş olubsan, 
Düşüb dilə, Nazlı, Nazlı.

 On bir övlad yükü çəkdin,
 Asanı yox, bərki çəkdin. 
Hamımızdan ərki çəkdin, 
Bilə bilə, Nazlı, Nazlı.

Mirzəlioğlu – baş ocağın, 
Uca adı – umacağın. 
Xoş günlərin, gözəl çağın 
İndən belə, Nazlı, Nazlı.

 Ağacınıq, götür barı, 
Bizimlə bağla ilqarı.
 Həsən Mirzə yadigarı,
 Durma elə, Nazlı, Nazlı.

 Dünya uzun, yolu kəsə, 
Yolçuları bəhsə-bəhsə. 
Mahirə bəxşiş istəsə.
 Düşmə felə, Nazlı, Nazlı.