Yazıçı-publisist Hacı Qəni Camalzadə ilə görüş keçirilib

Bakı Şəhər Mədəniyyət Baş İdarəsinin tabeliyində olan Nərimanov rayon Mərkəzləşdirilmiş Kitabxana Sisteminin Mərkəzi Kitabxanasında Azərbaycan Yazıçılar Birliyinin üzvü, yazıçı-publisist, I Qarabağ müharibəsi iştirakçısı Hacı Qəni Camalzadə ilə görüş keçirilib.

Tədbirdə yazıçı-publisist, Azərbaycan Yazıçılar və Jurnalistlər Birliyinin üzvü, “Ədəbiyyat” qəzetinin şöbə müdiri Aydınxan Əbilov, şair, Azərbaycan Yazıçılar və Jurnalistlər Birliyinin üzvü

Şahin Həmidli, Dəmir Yolu və Metropoliten üzrə Bakı Dövlət Peşə Təhsil Mərkəzinin tələbələri, kitabxananın fəal oxucuları iştirak ediblər.

İlk öncə vətənimizin azadlığı uğrunda canlarını fəda etmiş qəhrəman şəhidlərimizin əziz xatirəsi bir dəqiqəlik sükutla yad edilib.

Tədbiri giriş sözü ilə açan aparıcı yazıçının həyat və yaradıcılığı haqqında geniş məlumat verib. O vurğulayıb ki, tarixi romanların və çoxsaylı hekayələrin müəllifi Hacı Qəni Camalzadə özünəməxsus yazı üslubu, xüsusi dəsti xətti ilə sayılıb-seçilən yazıçılardan biridir.

Daha sonra çıxış edən yazıçı yaradıcılıq planlarından danışıb, yazmaq istədiyi yeni əsərlər və hekayələr haqqında məlumat verib.

Tədbir zamanı çıxış edən qonaqlar yazıçının şəxsi keyfiyyətləri,qələmə aldığı əsərləri, bu əsərlərdə cəmiyyətə çatdırmaq istəyi mesajlar haqqında danışıblar. Qeyd ediblər ki, yazıçı real həyat həqiqətlərinə söykənən maraqlı əsərləri ilə oxucularının xüsusi rəğbətini qazanıb.

Tədbirdə yazıçının həyat və yaradıcılığına həsr olunmuş videoçarx nümayiş etdirilib.