Sən mənim könlümə payızda girdin... - Əsgər RƏSUL

1001info.az "Günün şeiri" rubrikasında Əsgər Rəsulun "Tamarzıyam" şeirini təqdim edir. 

       Tamarzıyam

   “Mən ölsəydim, o bəlkə ağlayardı,

    Amma o ağlasaydı, mən ölərdim”

           Özdəmir Asaf                                           

  Qoşa addımladıq uzun illəri,

  Sənsiz bircə günü keçirmək olmur.

  Məhrəm duyğuları, gizli sirləri,

  Kağız parçasına köçürmək olmur.

  Qorxuram əlimə qələm alanda,

  Vərəqə qəlbinə dəyən söz salar.

  Hissiz misralara hopan yalandan,

  Bizim sevgiyə də yalan iz salar.

  İncimə, qarğıma bu qismətini,

  Acığın tutmasın mənə boş yerə.

  İçimə sığmayan məhəbbətimi,

  Mən necə sığdırım qafiyələrə.

  Sən mənim könlümə payızda girdin,

 Ömrüm  də payıza girib... razıyam.

  Sən hansı mövsümün meyvəsisən ki,

  İlboyu dadına mən tamarzıyam.